Ardal Forol Doc Penfro

Mae menter Ardal Forol Doc Penfro yn brosiect trawsnewidiol i Gymru a gweddill y DU gan greu cyfleoedd clir i ddiwydiant ar arfordir gorllewinol Cymru. Bydd yn sefydlu canolfan o safon fyd-eang ar gyfer egni morol a pheirianneg, lle bydd ffocws ar ddarparu ymchwil a datblygu blaengar yn y diwydiant a manteisio i'r eithaf ar gyfleoedd ar gyfer effeithlonrwydd gweithredol. Bydd Ardal Forol Doc Penfro yn helpu i sbarduno twf technolegau egni morol di-garbon, gan gefnogi datblygwyr ar eu taith drwy’r broses o ddylunio, profi, adeiladu a defnyddio eu dyfeisiau, tra hefyd yn darparu cyfleoedd ar gyfer arloesi diwydiannol ar draws y sectorau glas a gwyrdd. 

Bydd Ardal Forol Doc Penfro yn darparu’r cyfleusterau, y gwasanaethau a’r gofodau sydd eu hangen i sefydlu canolfan o safon fyd-eang ar gyfer peirianneg forol. Er y bydd iddi berthnasedd ar draws diwydiannau, mae ei ffocws uniongyrchol ar y sector ynni carbon isel. Ariennir y datblygiad £60 miliwn hwn gan Fargen Ddinesig Bae Abertawe, Cronfa Datblygu Rhanbarthol Ewrop drwy Lywodraeth Cymru, a thrwy fuddsoddiad preifat. Y pedair elfen yw: 

• Canolfan Ragoriaeth Peirianneg Ynni Morol (MEECE)
  Darperir gan: ORE Catapult
  Pwrpas: Ymchwil, cefnogi a datblygu ac arddangos, ysgogi arloesedd yn y gadwyn gyflenwi a lleihau cost ynni.
• Datblygiadau Porthladd Penfro
  Darperir gan: Porthladd Aberdaugleddau
  Pwrpas: Creu mannau sy'n helpu diwydiant i gynhyrchu, lansio a chynnal dyfeisiau.
• Ardal Prawf Ynni Morol (META) 
  Darperir gan: Ynni Morol Cymru 
  Pwrpas: Hwyluso profi cydrannau, is-gydosod a dyfeisiau trwy ddefnyddio meysydd prawf a bennwyd ymlaen llaw er mwyn lleihau’r amser, y gost a’r risgiau a wynebir a chyflymu twf yn y sector.

Parth Arddangos Sir Benfro (PDZ)
Darperir gan: Celtic Sea Power
Pwrpas: Galluogi isadeiledd adnewyddadwy alltraeth i sbarduno’r defnydd o wynt alltraeth  a chyfleoedd ynni morol yn y Môr Celtaidd.